أسئلة المقابلة الشفوية للمدارس العليا للأساتذة

أسئلة المقابلة الشفوية - المدارس العليا للأساتذة

تشترط وزارة التعليم العالي والبحث العلمي على حاملي شهادة البكالوريا، الراغبين في الولوج للمدارس العليا للأساتذة، شرط 24 سنة على الأكثر، كما تشترط عليهم كذلك النجاح في اجتياز مقابلة شفوية، يجرونها في المدرسة التي أُرسلوا إليها.

متى تجرى المقابلات الشفوية؟ 
من 04 إلى 08 أوت 2019 (يوما بعد ظهور نتائج التوجيه)

ما هي الأسئلة التي تطرح في المقابلة الشفوية الخاصة بالمدارس العليا للأساتذة؟

على العموم أسئلة المقابلة الشفوية قد تكون أسئلة شخصية، أسئلة معرفية أو أسئلة متعلقة بعالم التعليم ...

سألنا طلبة المدرسة العليا للأساتذة - أسيا جبار -قسنطينة حول الأسئلة التي تلقوها وكانت هذه بعض الإجابات (نقلناها كما كتبها أصحابها :) )

أجب بثقة، وابتسم في أوجه أعضاء اللجنة،لا تستسلم لاستفزازاتهم إن استفزوك وكن واثقا من نفسك

نماذج عن أجوبة بعض الطلبة في المقابلة الشفوية:
-

العصور الأدبية

السبب وراء اختيار الباء ثلاثة

وأسئلة أخرى سياسية واجتماعية وكذا منا ملهيه

-

كي يديرونجيك واحد فلاكلاص وش ديرلو

-

انا سقساوني معنى اسمي

مدولي نقرى بيت شعري وقالولي اشرحي كلمة برك

-

بالنسبة للغة الفرنسية :

الحاجة لولة يسقسيوك واش اسمك واش نقمتك وقداه في عمرك و وين تسكن

ثانيا يقولولك علاه خيرت l'ens والتعليم

ثالثا يجبدو la liste تاع les choix تاعك و يسقسيوك علاه حطيت هذا الترتيب بالضبط

رابعا علاه خيرت التعليم

خامسا قادر يسقسيوك على كاش هواية ديرها في حياتك ولا و نتا أعرف كيفاه تقصر و تتبسم معاهم اذا شفتهم يقصرو مليح و اذا شفتهم يلعبولك على المورال ماتقلقش و ابقى ديما متبسم على خاطر ام يختابرو فيك

وثاني اذا قالولك عندك مشاكل في اللغة و لا لازمك تعرف كيفاه تهدر معاهم و تقلهم بلي اني نحاول نريڨلهم و او شوية stresse برك و مع الوقت اني نتحسن و نوعدكم بهذا الشيء المهم جيبهالهم بالملاحة برك و ان شاء الله مايكون غير الخير بالتوفيق

-

عطاوني جملة نعربها (ههههههههه معرفت نعرب فيها والو لوقت هذاك الفعل بسيف باه عرفتو ) و عطاوني عمليات حليتهم شفويا و أسئلة كذا منا ملهيه برك .أهم حاجة أضحكو و أتكلمو عادي و ماتبينولهمش بلي خايفين بررررك

-

علوم دقيقة

تعريف بنفسك

سبب اختيار التخصص

سؤال رياضي بسيط

كيف تتعامل مع الصعوبات ان صادفتك

-

أدب عربي

اسمك سبب اختيار التدريس

ذكر بعض الشعراء خايرولي شاعر من لي قلتهم وقالولي اقريلنا بعض من شعره ( الاصمعي ) .صوت صفير البلبل 😔 مهم يحاولو يقلقوكم مام متعرفوش ديما ثيقة بنفس متبينوش ليهم لا خوف ولا قلقة وبالتوفيق ان شاء الله منوصيش على الهندام كاين لي يعلق على واش لابس لازم يكون لباس محترم

-

النسبة ل B3 : ابتدائي

سقساوني على التركيز في الفيزياء و انواعو و مدولو حالة و قالولي واشمن طريقة نستعملو بش نلقاو هاد التركيز..... و علاه خيرتي التعليم... المهم متخافوش و موفقين ان شاء الله

-

باك واش يخدم

علاه خيرتي ens

علاه خيرتي Anglais

Read this Paragraph from.... To..

-

لاه خيرتي التعليم

علاه خيرتي هذا التخصص بذات

مقابلة بسيطة لاتخافو

-

لماذا اخترت انجليزية بالذات .. ولم الطور الثانوي ! .. هل المدرسة العلييا كانت خياؤك الخاص ام خيار والديك . وهل في يوم من الايام ستقومين باجبار اولادك على اختيار تخصصهم الجامعي ؟ ماذا ستفعلين لو اختيارا سيئا ؟؟ كيف ستساعديهم .. لغة انجليزية .. باللغة الانجليزسة اكيد ... المهم متخافوش وبينو بلي تقدرو تهدرو اونجلي وتفهمو وش راهم يقولو

-

علوم دقيقة .

لأنو النقاط تاعي كانو عاليين ما سقساوني حتى سؤال عن التخصص

كانت اسئلة عامة

هواياتك

علاه خيرت التعليم و جاوبو وحدهم ! على جال المنصب قالولي كامل نفس الجواب

ادا كاين فرد من العائلة فالتعليم و هوا لي نصحك بيه !

مبعد هزو ورقة بالفرنسية بعدها عليا و قالي اقراها . كنت ما جبتش نظاراتي . ما قدرتش نقراها حتى قدمها 😂😂 . قريتها . قالي واش معناها قلتلو ما علاباليش

عطاني كتبت اسمي و لقبي . الخط كان كارثي من التوتر . رغم هدا ما هدروش ههههههه

ام يشتوي يختبرو الصبر تاعك . يستفزوك و يثيرو اعصابك و يشوفو ردة الفعل تاعك . مي نورمال واحد ال 15 ولا 10 دقايق و تفوت ههههه اصبر برك

-

بعد ما فاتت 90 طفلة دخلت انا اول طفل

خخخخخخ قالولي تعرف كيفاه جا قانون ثاني لنيوتن

اعطيني دور تاع sin و cos

و شكون فيهم زوجية

كيفاه قادر توظف فيزيك و مات في حياتك ....

-

علوم دقيقة

علاه خيرتي ens

واش حابة تخيري مات ولا فيزيك

قلتلو مات

سقساني أسئلة بسيطة فالمات

وبقينا نشايخو هههههه

-

علون دقيقة

قالي علاش ماخيرتيش الميدسين 😂بقاو يعاودولي ف هاد السؤال و انا نجاوب فيهم منبغيهاش

من بعد قالولي واش يخدم الوالد شحال نتوما ف العايلة عندك فيسبوك 😂المهم شاخو بيا و شخت بيهم و جيت خارجة

شافو ل كشف النقاط و خلاص

-

قالي لاه خيرتي التعليم قتلو نحبو والعايلة كامل فيه قالي روحي تروحي مالا هههه

-

علوم دقيقة

سقساوني علاه خيرتيها قتلهم نحب math

قالولي على جال math و لا علا جال المنصب قتلهم باينة على جال math😌 و مادامني جبت معدل مليح نصحوني نخير حاجة مايحة ليا و لي يأكد كلامي اني خيرت math lmd فالاختيار 4

على اساس انو كون متصلحليش Ens

سقساوني شحال في عمري جاوبتهم 19 قالولي ايييي صغيرة تخرجي 23 سنة قادر تقري لي في عمرك و يتمسخرو بيك واش تقوليلهم كون يتمسخرو بيك قتلو العكس هادي حاجة مليحة ليا نقولهم تبهديل عليكم ني قريت و كملت و هاني نخدم و نتوما مازلكم لهنا تبهديييييل عليكم

و كنت نجاوب و نضحك و مرتاحة طول

كي كملت عوان قال ااااا الله يبارك 😂😂

سقساوني بزاف و نا تاني نهدر بزاف 😅😅😅

سقساونيش طول على لقرايا

و طولت نا لتم كتر عليهم اكل

-

عرف بنفسك ...واش جيت تدير هنا ..وعلاه جاي لمهنة التعليم

-

تعرفي طيبي المحاجب ؟

باباك واش يخدم ؟ باباك هو لي بنالكم الدار ؟ امك واش تخدم ؟

تشتي لولاد ؟ مع السلامة

-

Sciences exactes b5

Elmouhim tdkhli tlgay 3 profs yjibulk war9a t3amriha mbaed chafou lgaw andi déjà bac galouli eleuh ma9ritich bih gltlhm much haba lmd haya gatli eleuh derti ens gtlha haba nwsl mn msg w'nkhrj motivation speaker w'hassa l'enseignement rah ykhlini nossl l'wch haba gtli maelich mbaed galuli wch haba tkmli gtlha jcp n9ra w'nkhayr gtli w'lukan jiti tkhyri f'1ere année baed wch tkhyri gtlha chimie w'na mani habtha la welou nkhrt brk haba math ms chafya ela chimie elabiha gtlha hkk haya elmouhim sa9satni haja jms sm3t biha rpndét ghalt haya 3tani rajl mo3adla gali wazniha w'gulili tafa3ol tassabon wchi huwa gtlou gali sahiti gatli l'mra awah nti mkich tae ens nradok lmd haya gtlha nzid n3wd l'bac w'mnrj3ch gtli ms khatyatk sciences exactes haya magoltlha welou lsl am rah yprovoquéwkm le max mat9l9uch juste matkhafuch gal nmout ela l'enseignement frt mm si jawbtou ghalt matkhafuch rakm kml najhin b'rabi

-

عطاوني جملة نعربها (ههههههههه معرفت نعرب فيها والو لوقت هذاك الفعل بسيف باه عرفتو ) و عطاوني عمليات حليتهم شفويا و أسئلة كذا منا ملهيه برك .أهم حاجة أضحكو و أتكلمو عادي و ماتبينولهمش بلي خايفين بررررك 😇

-

علوم دقيقية

مع اللول جابولي ورقة نعمرها

مبعد سفساوني علاه خيرتي lens قوتلهم على جال لبوسط

باباك ولا ماماك فدومان !

كانت لولا فلي شوا تاعك قوتلهم لالا

قالولي مالا ماكيش حابتها قوتلهم هيه

حابة تكملي ماط ولا فيزيك نقطتي فالفيزيك كانت 19 ايا قوتلهم فيزيك و انا منيش حابتهم لي 2 😹

سقساوني 2 أسئلة

1 ما الفرق بين النظرية و القانون

2 الفرق بين القوة الكهربائية و الميكانيكة ولا المغناطيسية نسيت

خرطلهم فزهر علاخر قالولي نردوك b4 نتي قتلهم كيما تحبو و خرجت

المهم هوما يحاولو يستفزوكم بالأسئلة تاعهم مديروش عليهم 10 min و يفوتو 😹😹

-

B3 arab.

اولا تعرف بروحك (الاسم اللقب تاريخ الميلاد مكان الاقامه شعبه و معدل الباك )

عربت جمله

سقساوني كيفاه نقدر تربط بين العلوم و الرياضيات

تعريف النسبيه

قريت جمله بعيده

طحت في لجنه يعيي و واعره تشلفط هههه

هذا مكان ربي يوفقكم

-

قدمي نفسك و علاه اخترتي انجليزية هي الأولى.. و علاه درتي فرونسي و نتي متعرفيش تحكيها كيما لونجلي.. بقاو يستفزوا فيا هكا برك (باللغة الفرنسية) المهم الثقة في النفس و اعطيهم فكرة انك ڨدها و تستاهل تقرا مدرسة عليا.. و ما تقولش خيرتها علاجال البوست مضمون 😂😂 اي ساهلة ام ولاو يقبلوا الأغلبية

-

اسمك .علاه خيرتي المدرسة العليا للاساتده .

ماهو رأيك في الدروس الخصوصية؟

ادا اضطرتك الظروف هل تدرسين دروس خصوصية .

سؤال في الرياضيات عن انواع الاعداد

ويتمسخرو بيك يبكيوك شوي وصاي 😂

-

شفيت قالي نشدي قسما ههههه من الشوك نسيتها

-

تعرفي تغني وش لغناء لي تحبيه ،وتحكي شاوية ،تعرفي تطبخي الاطباق التقليدية ، اقراي الجملة مكتوبة في ورقة ، سلام ههههه

أسئلة المقابلة الشفوية - المدارس العليا للأساتذة